By ගාලුමුවදොරට ඇතුළු ප්‍රදේශවල ඉකුත් දින කිහිපයේ ගාල් කර ඇති රජයේ වාහන සියල්ල අත්‍යවශ්‍ය සේවාවන් සඳහා යොදවීමට ජනපති අනුර කුමාර දිසානායක මහතා උපදෙස් ලබා දී ඇති බව ජනාධිපති පෞද්ගලික ලේකම් ආනන්ද විජේපාල මහතා ඊයේ (සැප්. 26) ප්‍රකාශ කළේය.
පසුගිය රජයේ සමීප හිතවතුන්ට ජනාධිපති උපදේශක ධූර අලුතින් නිර්මාණය කර ලබා දුන් වාහන 107ක් ගාලුමුවදොර ප්‍රදේශයේ ගාල් කර තිබෙන බව පෞද්ගලික ලේකම් ආනන්ද විජේපාල මහතා ප්‍රකාශ කළේය. මෙම වාහන සම්බන්ධයෙන් සවිස්තර විමර්ශනයක් ආරම්භ කර ඇති බවද ඔහු වැඩිදුරටත් අවධාරණය කළේය.
මෙම වාහනවල ඉන්වෙන්ට්‍රි පරීක්ෂා කර සම්පූර්ණ සමාලෝචනයෙන් අනතුරුව ඉදිරි දින කිහිපය ඇතුළත ගිලන් රථ සේවාවන්ට, අධ්‍යාපන ක්ෂේත්‍රයට සහ පොලිස් ස්ථානවලට වෙන් කරන බව පෞද්ගලික ලේකම් ආනන්ද විජේපාල මහතා පවසයි.”
ජනාධිපති කාර්යාල පරිශ්‍රයේ වාහන අංගණයේ ඉඩ අවමවීම නිසා තැන තැන ගාල් කර ඇති මෙම වාහනවලට උපරිම ආරක්ෂාවක් සැපයීම සඳහා ජනපති අනුර කුමාර දිසානායක මහතා නියෝග කළ බව පෞද්ගලික ලේකම් ආනන්ද විජේපාල මහතා ප්‍රකාශ කළේය. ඒ අනුව, පොලිස් නිලධාරීන් ආරක්ෂාව සඳහා යොදවා ඇති බවද ඔහු වැඩිදුරටත් සඳහන් කළේය.
ජනාධිපති කාර්යාලය විවිධ ආයතන වලින් කුලී පදනම යටතේ ලබාගත් වාහන 59ක් මෙම 107 කණ්ඩායමේ අඩංගු බව පෞද්ගලික ලේකම් ආනන්ද විජේපාල මහතා ප්‍රකාශ කළේය. එමෙන්ම, ගාලුමුවදොරට වාහන 46ක් ගාල් කර තිබෙන බවද ඔහු සඳහන් කළේය.
ජනාධිපති කාර්යාලය අතුරුදන් වූ වාහන 29 ක් ඇතුළුව යතුරුපැදි 82ක් සහ අනෙකුත් වාහන 740 ක් සමඟින් සමස්ත වාහන 833ක් තිබෙන බව පෞද්ගලික ලේකම් ආනන්ද විජේපාල මහතා ප්‍රකාශ කළේය. ඉන් යතුරුපැදි කිහිපයක් අතුරුදන් වී ඇති බවද ඔහු අවධාරණය කළේය.
